ماظنى ابقى شجاعة

بتمنى أنساك وأكرهك .. بتمنى من كتر الجروح الفينى
لو يوم أجرحك .. بتمنى أبقى شجاعة جد
مع نفسى وأقدر أشرحك ..

ما أنت واضح ومابتدس
لاك فاهم الحب.. لا الغرام .. لا حازى فى نفسك خصام ..
لا بتوجعك لحظة صدام ..
لا بتسعدك ساعة سلام .. لا بغيرك كتر الملام ..
لا مرة شوقك لى غلب
او دبت من نار الغرام .. وأنا زى مخدرنى العشق
... وأنا عشقى حالة أنهزام ..

لو ديمه تهدينى الوجع أنا ديمه بهديك أحترام ..
لو أنت متناقض هواك
أنا دين هواى الأنسجام .. باكر تضيق الدنيا بيك ترجع تعيد نفس الكلام ..
ترجع تقول بتحبنى وأنو الفراق أصلا حرام ..
وأنا ديما بيك متعودة
أنسى الحصل.. وأنسى الخصام ..
وأنا شان بحبك.. وبعشقك برجع ببادر بالسلام ..
برجع بصدق كلمتك لو طال حديثك فينى لام ..
ما الريدة اصلا بشتنة بتحلل الحل.. والحرام ..
شان ماك عارف الريدة ايه
اسمع كلامى الليلة هام ..
الريدة نظره شوق شديد
من رمش هداهو العطش عن غير عيون محبوبو صام ..
الريدة ضحكة.. وأبتسام ..
الريد تناسق.. وأنسجام .. الريدة أحساس بالسلام ..
أحساس وساع وسط الزحام ..
والريدة قلبين التقوا حفظوا العهود.. والعهد دام ..
شان كل دا...
ما اظنى اقدر أكرهك .. ما اظنى بى رغم الجروح
الفينى يا زول أجرحك ..
ما اظنى ابقى شجاعة جد مع نفسى وأقدر أشرحك