لسه فاكر

لو انت مفتكر القليب يهواك تاني متل قبيل
يادوبك اتغشيت وأكيد دقيت باب المسحيل
انا كنت بي رقم الجارح جاييك ولو داير الدليل
اهديت مشاعري الطيبه ليك بي طيبة الزمن الجميل
وا حرقة القلب الهواك رقم التباريح والشجن
...

كان حلمو يرتاح في هواك ويلقالو في عينيك وطن
لكين اذا جارت ظروف واحلامنا ديك ضاعت سُدن
لا انت لا الشقا لا الظروف قادرين تسوولي الرسن
انا زي عصافير الخريف جواي طاقه من الحماس
كضاب تجهجه دربي ريح لو شايله في جوفه الرصاص
انا صح بريد عينيك موووت وبلقاك في كل الحواس
لكنك انت غدرت بي وسقيتني من المره كاس
فارقني يلا خلاص امش وما تتلفت ابداً وراك
وماضينا بي طبعو السمح ريحني شيلو كمان معاك
والله لو كان الجرح يدفني في بير الهـــــــــــلاك
وفي الدنيا اتصنف شقي ارحم لي من جنة هواك
شوف منطق الاشياء بيقول انك تفارقني وخلاص
ومهما يكون احساسي بيك غير الفراق مافيش مناص