كل ماأفوت،أمشى وأجيك،
ألقى جنبك زول جديد!!...
وأرجاك،وأقعد منتظرة
لا قادرة أطولك وأوصلك،
لا وجودى بجنبك بيفيد ...
وعشان تشوف حظى الكعب،
لاعرفت انساك واستريح ،
لا مره صادفتك وحيد...
أصلى ما محظوظة معاك،
مرات اقول يمكن ذنب،
حق زول وانت بتخلصو،
ومرات اقول قلبى العنيد..
وجايز تكون إنت السبب،
خليتنى مامحظوظةكده،
لحظات قريب،ساعات بعيد...
و بقيت شبه ناسآ كتار،
بتقول كلام ما بتعملو،
ويوماتي بى وشآ جديد...
وروني يا خلق الله هوي،
ساعدونى أعرف مين غلط،
وأدونى عقلى الكان رشيد ...
حظى الكعب ولا الحبيب؟؟
ولا القليب غاوى التعب،
مع زول بيلعب ومابيريد!!!!!!
ليست هناك تعليقات:
إرسال تعليق