واعدنى ليه
واعدنــــي ليــــــه ؟!
أنا كنت قبال ما أقابلك
راضية بي دنيــاي جد
لا بعرف الريد والغرام
لا عنــــدي هــــم خاتية المشاكل والعقد
لا عندي تلفونا بــــرن
وأقعد مساهرة شان أرد
لا بقعد أسرح في النجوم
وأعدها ولامـــن أتــــوه
أرجـــع من الأول أعــــد
ورينــــي ليــــه ؟!
دقيت علي قلبي الرهيف
وخدعتو بي أجمل وعد
خليتو يفتح ليكــــ باب
قبلك يمين ما خشا حـــد
وغرست فيهو بذور هواك
وسقاها بي دمـــي ونمت
لامــــن ملت كل الجســــد
وبقيت خلاص مفتونة هواك
وهواك هدهد حيلي هــــد
جـاوبنــــي كيف
قلبك بيلعب بي مشاعر الناس
بدون إحساس
متل حجــــــــر النــــــــرد
وكتين رأيت قلبي الحنيــن
بنزف من الجرح الأليــــــم
بالزمــــه هل قلبك سعــــد
نسيــــت خلاص
وقتين بتغلــــط فينــــي
وأرجــــع ليــــك أنا
وشايلة معاي باقه ورد
ما شان عيونك كان بجي
لكني ما بقدر أصبر قلبي ليك
لامن تحــــن إنت و تــــود
وعيونــــي
ما بتتحمل الشقــا والدمـــوع
تستني لي لحظـــه رجــــوع
بالإعتذار مـــــــن مستبــــــد
لكن مدام
وضحت نوايــــاك ياجميــــل
تحرم عليك دمعاتي تنزل
للأبــــــــد
وإن كان علي قلبي الجريح
إطمن إنت مصيـــرو يــــوم
تلفاهو بي تريــــاقو يــــد
وإن كان علي تمن الشقــــا
العانيتو جد في سكتــــــك
خليتـــو للواحــــد الأحـــــد
واعدني ليه ؟!
أنا كنــت قبال ما أقابلــــك
راضــــية بي دنياي جــــد
ليست هناك تعليقات:
إرسال تعليق