شان انساك

انا قلبى شان ينساك دايرلو تانى زمن
عفوا حبيب قلبى ما انت لى وطن

انا قلبى ذنبه شنو عودتو انت عليك
علمتو يبكى ينوح يوم ما يشوف عينيك
وكتين ملكته خلاص فريتها لىجنحيك
خاطبته باستبداد قلت ليه اختار ليك

هو الصابر المسكين راجى الليالى تروق
لا كل لا مل لا عاتب المعشوق

كل القدر قالو ياناس كتلنى الشوق
ما الضقته فى دنياى ما ضاقو قط مخلوق

انا يا خلائق اه ضقت العذاب اصناف
شلت الليالى سقد تشهد تبارك وقاف
جربت صبر ايوب كانت نهايتو كفاف
ما الصابنى يالمريود بالعين محال ينشاف

لو دار تعرف البى ارجوك مرة تعال
اقعد وعاين بس ما تسال اى سؤال
انا يا حليلى انا اصبح يمينى شمال
جوايا عشرة اشياء خلت حياتى محال
حظى التعيس الشوم الغيرة والعذال
ليل الضياع والخوف والحيرة والاهمال
انك تملى معاى و بيناتنا كم اميال
احساسى انى بسيط واحلامى واقفه جبال
صبر اً صبرتو عليك ذكرنى سيدنا بلال
حتى ان سكت انا تتكلم الاطلال
وآخر المطاف بالليل سافرت باستعجال
لا طلت بلح الشام ولا ضقت راحة البال
برضك تقول لى اصبر اتحمل المكتوب
واتعوض الله خلاص انسانى يالمحبوب
خليتنى ذى عصفور هبت عليه هبوب
فنتلو عشو شمال شالت صغارو جنوب