كـــيف اكــرهك

 معذورة قالت بكرهك
قاسي وصعيب القول عليك
سيب الكلام مايتوهك
والقسوة فيه ماتجرحك
...

هاك الكلام البفرحك
انا ردي قادر يريحك .. مابكرهك
...............
الزولة حين تشتاق شديد
وماتلقى في قلبك جديد
تغرق وسط شوقا العنيد
تركب شراع آمال بعيد
والشوق يصير نيران تقيد
لازم تقول انا بكرهك .. مابكرهك
................
مسكينة قالت بكرهك
ماتبكى تشرح حسرتك
حبيت حبيب مابقدرك
ومشيت طريقك مابشبهك
فيه مالقيت زول نبهك .. مابكرهك
..............
وراجع على مر العهود
وابداها من ماضي الجدود
هل يوم فراش زار الورد
ولقاها تختار الجمود
تتجنى تنكر للعهود
وتبدل الود بالصدود .. كيف اكرهك؟
....................
واعرف كمان انه الاكيد
في الريدة من عهدا بعيد
كيف كل عاشق كان عنيد
ناضل عشان ريدو الوحيد
وكل مناه يعيش سعيد
ويغني بالافراح نشيد .. ليه اكرهك؟
.................
والريدة لازم تستمر
لوحتى قيس في هواه ودر
لوجن قال في الحب شعر
لوضاع حبيبو وما قدر
من بعده لحظات يستمر
يتهنى يسعد بالعمر .. مابكرهك
................
ماتقول خلاص ضاع الحنان
وترمي باللوم للزمان
وتغيب عشان تنسى اللي كان
وتتوه تفتش للحنان
انا بلدي فيه الحور حسان
بتبادل الريد بامتنان
مابتقبل انه تكون مهان
وتعاني شان زلة لسان .. مابكرهك