الحكمة

كل التريدو بيجهلك بالله ليه؟
والتآباه تلقى معاك معاك في الثريا يحصلك
التهوى من جوه القليب تلقاه ممعن في الجفا
والحكمة تلقى مع سواك اخر محنة واصطفى
اهلا يقولا بلا نفس والبسمة الا تصادفه
والشي البحير بإختصار زى مايدور بيشكّرك
اما البترفضو يا سلام تلقاه كايس يسعدك
يهواك بلا كلفة ونفاق بينات رموشو يقعدك
مابيرضى فيك ابدا كلام لو انت مافي يمجدك
لو جيتو قتلو جيب عينيك رغم العليك مابيخذلك
...

حيرني امرك يا غرام اصبحت زي مطر الخريف
الناس تكوسلها في الخلا وتلقاها غرقت الرصيف
الدنيا زي ما قالوا ديل معروفه ما بتدي الحريف
والقسمة ان طال الزمان تجي في النهاية تكبلك
تلقانا برضنا نعترض ونتناسى إنو مسطرة
طوالي بالليل والنهار دمعاتنا زي نهر أدبرة
ممكن نخاصم بالسنين ونسيب بعض في الجمهرة
مع انو مذكور بالدليل تبرا الخصومة بتهلكك
خلق الله مالا بقت كدي يا ناس عقولنا اتحيرت
ياربي هل جار الزمان ولا النفوس اتغيرت
في الماضي كان الناس حنان زي العصافير في الدرت
والليله شان حفنة تراب ممكن شقيقك يكتلك
راجع الاحداث براك قلّب كتابة واكشفه
الدهشة في أول سطور عدم اكتمال المعرفه
لو تنهر الطفل الصغير امو بتقول إيه الصفه
ممكن تخاصم بالسنين في الماضي كان مابتسألك