الاثنين، 23 أبريل 2012

ابوى


يا أبويا لا...يا أبويا ما تزيد الشقاء...ما لسه بنتك ما مره...لسه طفله وعضمي لسه ما انبراء...يا ابويا أحسن سيبني احيا في الضراء...ولو تسوقني هناك بعيد,ابقي كورك وليك اقول يا ابويا لا...وليك أكورك حتي لو حسي انهراء...واقول,ما تقتل قليبي,ما كا...ن زمان في الليل سري...يا ابويا ما تخلي الكلام شايلو الهوا...أسمع كلامي وقول كلامك في الختام يا ابوي انا...
انا لي حبيب حامي ألحمي...وكمان بزيل عني العني.يا ابوي بحبو وحبو مزروع في القلب جوه الحشي...يا ابويا حس بي شوقي ليهو...حس بي جيب الهنا... وادينا بس اثنين سنه...وانا ليك برجع اصلي دائماً ترسم طريق في عمرنا...وما نفارق للرسم في دربنا...لكن الزواج يا ابوي اصلو غير شكل في امرنا...و خليني اختار الرفيق يا ابوي انا.سكتت خلاص نزلت دموع متلونا...وقالا قولاً فيو ضني...وقف هز شالو وجا دني...وقالا بوك كلمه منو طالعه سيف تقطع وريد والالنسا...كلمه قالا وما بيرجع مهما كان في ألازمنا...وأبقي عارفه انو داك اخترتو ليك يا سوسنا...واحسن تقولي الفيو عقل من الكلام او تخرسي الالسنا...أبوك حكيم عارف مكانتك وقدرا... وانتي الامانه اللينا ربنا ادنا...ولازم نصونك في الدروب والامكنا...ما طول عمر عايشين عشانك اصلنا..وايه الحب يكون؟ غير كذب بنافق بنتنا..غير وهم بمر بي جنبنا...ابقي راكزه وليا طيعي لي انا...وحسي نومي وختي راسك في المخده وابقي فاهمه لي كلامي حسه حسه.. والشيطان منك اطردي شان ليك مسه...وسيبي الغبا سيبي العناد والروشنه...وما تقولي لسه طفله...قدرك فاتحين بيوت من كم سنه...وزادا قولاً وقالا بكره ما بعيد اصلو الكلام انتهي...ليهو ردت منو القال الكلام انتهي...ده الكلام يا دووووب بداء...انا ليو وعدت لو اموت بس اجيب ليهو الجنا...وديمه انده ليو حبيبنا وعمرنا...أحلم معاو ويجيب فرح يحيا دايماً قربنا...والسعاده تتنطط دوام في دربنا...وما عايزاك تحرم حبنا...يا ابوي قرب لي هنا...قرب قريب شوف القليب في حبنا...ما هو المنقص حزننا,بل ديمه فارج للظروف لي همنا...وشوف العيون الكان زمان فيها البريق,ولا الخجل الكان معتق بالعبيق,يا ابوي بنتك من زمان اديت عيونا للرفي, ادت حنانا للصديق,يا ابوي بنتك خلاص تاهت بين مضباط المضيق,وانا ليو بحب ما اي زول لو كان ملاك او كان طبيب,او كان ملك منك قريب,وانا ما بخون اللي حبيب...ما انت قلت..(لازم نصون لي عهد اديناهو وما نظلم قليب).
يا ابويا لا....يا ابوي شوف عقلي بفكر في شنو؟ ومشغول بي منو؟ شوف حويلو ولو تحايل,.شوفه حسا واقده نارو, وماشه فوق نارو قايده, نارو تكوي زي لهب بس فينا قايده, وكل ماتخف فينا تكوي تاني عايده.
يا ابوي لا...يا ابوي لا...يا ابوي لا
مشه وخلاها وحيده...دمعه جاريه وانف سايله وقلب نازف بي جراحو ونارا حاميه...امرا مشتت وماها صابره...وامها قال(يا بنيه,ابقي واعيه وحني ليا... وماف كلام ينقال الاصبراً في الامر لو كان اسيا...والزمن لازم يحرم في الليالي وشوفي امك نارا حيه...وابقي صابرا وليهو طيعي في البليه...وارضي بوكي وانسي زولاً في المطيه...وانا عارفه حالك زي سيناريو انعاد عليا...اصلو امك حالا زيك في الزمان وهي هي...احكي ليهو,لي حبيبك...وقولي(محكوم عليا...وكل نار الدنيا,جابا ابويا ليا).وشوفي ردو ولو بحبك حيقول كلام انقال اليا.
امها فاتت وخلت احزانا عصيا...راقده تتوسد الم,والفراش فيهو الامل,والبال بعيييد كايس بفتش عن حبيب عالي واهم.
الصبح ازن..الديك كورك..الشمس شرقت ولسه الجوف محرق والدمعه نازله في الخديد وليها آلاما بتزيد..والعين مساهره ومانامت اكيد.. واليد موسده بالحديد.. والروح مشحتفه من جديد.........وفجاءه ابوها قالا (يابت مافي مره.. وشال كمان تلفون وخته.. خته حكمو في جميل مظلوم وبته.. بته قال جمعه عرسك وشوفي حالك وابدي احسن ابدي حسه..يا ابويا لا....ياابويا لا.... يا ابويا لا.
فات مرق من الفريق وخلي قلبا في الطريق..أو كان محاصر بين حريق..او كان بناهد لي نفس زي زول غريق..وفي الاخر رجعت لي مكانا والصدمه ديك كان انتهت...شالت رقم دقت على قالت ...(تعال ,حصل تعال ,الحق سريع.أصلو تاني مافي ايام من ربيع, بس صيف موهج يا الحبيب,او قول جليد جاي من قريب,ده الفينا فينا بعدك يالطبيب,ولابد نطش عن كل دريب,وفينا نقفل كل ابواب القليب)
سكتت...جرت دمعه سقت في خديد. كان يادوب استجمعة افكاري وقول رديت.(أيه الحصل؟قالت عريس مليان قروش,عندو الحياه الماعبوس,لي خطب خلاص وبارك,لي طلب وابويا وافق,وجمعه جايه يا حبيبي راحله راحله من ديارك,ولي مكانك مامكانك ولي زماناً مازمانك,يا حبيبي ياقليبي يالمحصن بي تيارك,يالوحيد الفي قلبي شارك,ويالانا لسه لافه.. لافه لافه في مدارك,بس بوصيك(أوع تقفل عني دارك,وخليني ديمه جوه جوه جوه بالك,ولو سرحت اكون خيالك,وبدعي ليك وأقول(انشاء الله تمشي تنول مرادك,والسعاده تضوي دارك,والامل يسكن معاك, وتبقي سايقو بي وراك,وديمه ضاحك وعالي زايد في علاك,وانا يا حبيبي بعتزر شان ما قدرت اوفي الكان معاك,وما بقدر اسيبك وامشي لي زولاً سواك.
قول لي العمل ولي انصح يا ملاك.
قول ولي فضفض الجواك.
وانا ليك بحكم امري دايماً وليك في اموري الانصياع,حتي لو تختار ياحبيب عني البعاد.
انا قولي خلص.ورفع في سفنو الشراع. وانت قول خلاص وامرك دوام هو المطاع.
******
انا حا احكم فيك.واسمعي شان القول ليك.وانشاء الله اقدر أوفي الليك يرضيك.واختار البسعد قلبك وليك يفديك.
اسمعي قولي اصلو القول ده..ده قول عانيك.
( طيعي ابوكي يا بنيه..اصلو بوكي ومهماً يعمل برضو بوكي..لو ضربك بكاك يا هو ابوكي..ولو حرمك سباك يا هو ابوكي..وهو العارف المصالح من عدوكي..عيش دنيا يا بنيه تكون سخيه..أوفي ليهو وكوني ليهو حتي لو نيراني حيه..وامشي عيشي في قصورو وخليهو مشارك في الاسيه..وليهو قولي بحب عيونك وانت وحدك نور عينيا..وقولي ليو اجمل كلام قلتيو اليا..وانسي حبك وانسي زولك وشوفي حالك يا عنيا..امشي سافري وابقي ابقي بت غنيه..أصلو القروش ملعون ابوها زي اكل لي لحمه نيه..وانا كنت فاكرك في الزمان حتكوني ليا..وديمه تجري بس عليا..وليك اقول حني ليا..لكن خلاص الفيك عرفتو وخليكي عارفه ,انو انتي عايشه فيا..
في صلاتي وفي كلامي وكل مكان محسوب عليا..وانتي ابعدي بالسنين, ولو تعودي اكيد حا تفرح بيك عنيا..واسقيك حنان واديك فرح واجيب زهروك بين اديا..ويا بنيه طيعي بوكي يا بنيه.وما تخوني في يوم عريسك وليهو صوني وما تحرمي الشوق عشاني..
وليكي بحكم اصلو زولك ما جبان وليكي بحكم في امورك..
عارفه ردي بكون شنو؟
عارفه حالي تكون شنو؟
ماعارفه حاجه شان غبيه..شان الحكم معروف يا صبيه,ولازم الكل يعرفوا اني ليكي ماني عايد, وماني راجع لي ديارك, والليله سافرت...من مطارك,
وانا جد بحبك وبحب امورك وكل قولك,وبحبها حالك وبحب كمان اوصاف عيونك,بحبها ريحتك وبحبها صورتك, بحبو زعلك وبحبها سيرتك وبحبو وصفك, وانا جد بحبك يا بنيه..

ليست هناك تعليقات:

إرسال تعليق