اهواك انا

أهواكِ ريد قطّع نياط صبر القصيد
فاضت دموع سالت جـداولها ليك غُنا
أهواكِ شوق فتح عينيّ على الدُّنا
ورتّب حروف الشوق قوافي ودوزنا
خلاني قاعدة في رجاكِ ومنتظرة
... حزنانة كئيبة مستنية لـحظات الهنا
آه يا أنا آهات تزيد كل يوم جديد
من الضّنى وغيبوبة الزمن المعكّر صفونا
ما عندي شي غير اشتكي منك وليك.
أحكم عليّ أو مرة لي خليني أعرف مين أنا
يمكن أكون أنا زول غلط ما بهمني بس
المهم حكمك عليّ لو يبقى سجنا كم سنة
أناأصلي ما مسجونة هواك راضية الهلاك
في حضرتك بالّنسبة لي غاية المنى
كيف تبقي ليّا مجرد إحساس بعدما
نور شعاع أمــلك ظــلام الأمـكنة
ما إنتٍ ليا هدف نبيل ما مستحيل
بـس قــول لـي وخــلي الــبكون لـي ربنا
كيف تختفي ؟ لو تختفي عمري بيقيف
ما انت من نبض القليـب الشـال هــواك متمكّنة
خليكِ جُوّه مع الدفين مابين فتافيت الحشا
خليكِ في خاطري الحزين مشتول زهرة سوسنة
خليك أمل بسام يدغدغ في القليب الضاق
حلاوة الريد بقت في العتمة ليهو سـنا
خليك معاي وانا باقي ليك يا سيد هواي
بــكـرة الـظـروف فـرحـانة ترضى تلــمنا
خليك مع زولا بحبك موت ويخلص ليك
عـزفتك ريـد على الأوتار سـواكي غنية و دندنة
لاتجهجه القـلب المعـذب بي هــواك
كـل ما يجيـلك من هنا يلقـاكِ  بالـجيهة الـهنا
آه يا أنا آه يا أنا خليتا كل الكان هنا
الـشـي الـوحـيد الـباقي ليهو وباقي لي أهواك أنا