فستان فرح

انا حزني كان يوم الفرح
سافرمعاي هماَ كبير,, غطى الفرح
وأنا كنتا مجنونة فرح
وزعلتا يمكن حبتين...
مرت شهور واصعب سنين
عوضني الله في صبري خير
ورجعتا مجنونة فرح
يايمة لو شفتي الجميل...
فرحني حد المستحيل
ميلنا ميل.. وضحكنا حيل
وغرقنا لي حد البحر
خليت وراي كل القصور
وسكنتا في بيت من شعر
مساح دموعي وعبرتي...أقوي الرجال
راجل حنين..كباب دميعات الفرح
وش الشهامة مع المحنة..
أهديتني فستان من فرح
...وطلعتا بي ضد النظام..القايل انو الريد حرام
ياأنت ياميدان فرح..حررتا جواي الفرح
لمة فرح,,لحظة فرح,,دمعة فرح,,ميلاد فرح
مطرة فرح,,ريحة فرح,,فستان فرح
قلباَ يدق ,,,يدق,,, يدق,,,
قررررب يطير من الفرح...رغم الخيال والإحتمال...شكرآ على هذا الفرح....
سيد المروءة وسيدي
بس شوف حضورك فيني كيف
طالت ضفايري من الفرح
فرهدتا لوني من الفرح
ضحكت عيوني من الفرح
انا فرقي من باقي الخلق,,
انا شايفة فيك أمي وأبوي ,صاحبى وأخوي
شيال همومي كما البحر
الحزن مسجون في عينيك,, وانا نفسي اهديك الفرح
انا وانت عازمنا الفرح..قال اصلو طول مننا
ناكل لقيمات من فرح,,
نشرب مياة بير الفرح,,
نتغطى بي توب الفرح,,
الحزن محفور زي قبور’’
وانا وشي كذاااااب ياولد
بديك إحساس بالفرح
رغم الحضور والضحكة كان ماليها نور
الليلة شاف عيني تقول ..يامحسنين حبة فرح
يامؤمنين حتة فرح....
زعلانة من حاجات كتير,,وانا عاملة فيها البت فرح
وصفتا وصفات للفرح..في قلب صافي ولا فرح..ابعد من الغل والحسد...
جيب التفاني مع التواضع والتسامح والمرح
رش السكينة مع التفاؤل والكليمات الحنينة
تديك قنطار من فرح,,,
وأنا لسة ما زارني الفرح,,لكني بعرف طعمو كيف
وانا لابسة توبي من الهموم
أشحت من الزمن البخيل ...
شان أهدي جاراتي الفرح....رغم الخيال والإحتمال ...شكرآ على هذا الفرح